पिआरपी भन्नेबित्तिकै धेरैले झरेको कपाल उमार्ने उपचार भन्ने सोच्ने गर्छन् । तर, खासमा यस्तो भने होइन । यस्तो पद्धतिले धेरै किसिमका समस्या समाधान गर्न मद्दत गर्छ । सामान्य भाषामा भन्नुपर्दा पिआरपी भनेकोे आफ्नै शरीरमा भएको तत्वबाट गरिने सामान्य उपचार पद्धति हो । पीआरपी सर्वसुलभ ढंगले उपलब्ध हुने स्वास्थ्य संस्था तथा अनुभवी चिकित्सकसँग परामर्श गरेर यो विधि अपनाउँदा राम्रो हुन्छ । 
मान्छेको रगतमा विभिन्न किसिमका आन्तरिक रसायन हुन्छन्, जसले शरीरका विभिन्न तन्तुको वृद्धि र विकासमा मद्दत गर्छन् । रगतमा हुने यी ग्रोथ फ्याक्टरको भण्डारण भनेको प्लेटलेट हो । प्लेटलेट भनेको एक प्रकारको रक्तकोष हो  यसले चोटपटक लाग्दा शरीरबाट रगत बग्न दिँदैन । प्लेटलेटमा रगत जमाउने रसायन पनि हुन्छ । शरीरको कुनै ठाउँमा चोट लागेपछि केही समय रगत बगेर पछि रोकिनमा यही प्लेटलेट भन्ने तत्वले काम गरेको हुन्छ । पिआरपी उपचार विधिमा रगतबाट यही प्लेटलेट निकालेर प्रयोग गरिन्छ । आफ्नै शरीरको रगत निकालेर प्लेटलेट मात्र छुट्याएर प्रयोग गरिन्छ । 

हाडजोर्नी र दाँतको समस्यामा उपयोगी
एक दशकदेखि मेडिकल साइन्सले यसको प्रयोग गरेर विभिन्न रोग तथा समस्याको उपचार गर्दै आएको छ । पहिलो पटक प्लेटलेटको प्रयोग हाडजोर्नीसम्बन्धी चिकित्सकले गरेका थिए । दन्त शल्यक्रियामा पनि यसको प्रयोग हुँदै आएको छ । हाल छाला तथा सौन्दर्य उपचारमा पनि यो अति नै उपयोगी हुँदै आएको छ ।
एथलेटिक्स तथा फुटबल खेलाडीलाई घुँडामा चोट लाग्दा पीआरपीको इन्जेक्सन दिँदा चोट छिटो निको हुने र खेलाडी छिट्टै खेलमा फर्किन सक्ने हुन्छन् । पीआरपीले विभिन्न ग्रोथ फ्याक्टरलाई सक्रिय गराएर कोष तथा तन्तुलाई वृद्धि गरी चोट लागेको ठाउँमा पुनर्निर्माण गर्ने काम गर्छ। शरीरको आफ्नै सिस्टमले कोष तथा तन्तुको विकास र पुनर्निर्माण छिटो गर्छ । फ्य्राक्चर भएको ठाउँमा प्लास्टर लगाएर राखेपछि शरीरको आफ्नै प्रणालीले फ्य्राक्चर निको हुने हो । भाँचिएको हड्डी जोडिने हो । बाहिर लगाएको प्लास्टरले भाँचिएको वा फ्य्राक्चर भएको ठाउँलाई हलचल गर्न नदिने मात्रै हो । शरीरमा भएका तत्वले नै शरीरका विभिन्न समस्या समाधान गर्न काम गरिरहेका हुन्छन् । पीआरपी गर्नका लागि शरीरको कुन भागमा कस्तो समस्याका लागि गर्न लागिएको हो, त्यो निक्र्यौल गरेपछि रगत निकालेर प्लेटलेट छुट्याउने काम गरिन्छ । रगतबाट प्लेटलेट छुट्याएर इन्जेक्सनमार्फत दिनका लागि बढीमा ४५ मिनेटको समय लाग्छ । रगत निकालेपछि आधा घण्टामा प्लेटलेट छुट्याउन सकिन्छ । 

कपाल झर्न रोक्न उपयोगी
आफ्नै शरीरबाट निकालेर प्रयोग गरिने भएकाले यसबाट कुनै साइड इफेक्ट हुँदैन । कपाल झर्नुका विभिन्न कारणमध्ये कपालको जरा बलियो बनाउने ग्रन्थि कमजोर हुनु हो। पीआरपी इन्जेक्सन दिँदा कमजोर भएको ग्रन्थि बलियो हुन्छ र कपाल झर्न रोकिन्छ । नयाँ कपाल पलाउँछ । पूरै तालु खुइलिएको समस्यामा पीआरपी गरेर मात्र कपाल पहिलाको जस्तै बाक्लो हुने सम्भावना कम हुन्छ । त्यसैले कपाल प्रत्यारोपण गरिसकेपछि पीआरपी गर्दा झनै राम्रो रिजल्ट आउँछ । 

चाउरीपन, दाग, नसा फुलेकोमा उपयोगी
बढ्दो उमेरका कारण देखापर्ने चाउरीपन, अनुहारको दाग, खटिराको दाग, निको नभएको पुरानो घाउ, पोलेको दाग आदिमा पीआरपीको इन्जेक्सन दिँदा यसले राम्रो परिणाम दिन्छ । पीआरपीले रक्तनली, शरीरका विभिन्न कोष र तन्तुलाई पुनर्निर्माण गर्ने काम गर्छ । तालु खुइलिने समस्या,  छालामा ग्लो ल्याउन, डन्डीफोरको खत, पुरानो घाउ, स्ट्रेच मार्क, नसा फुलेको आदि समस्यामा पीआरपी उपचार पद्धति प्रभावकारी हुन्छ ।