गोडा किन सुन्निन्छ ?

• मुटुरोगका कारण वा मुटुमा समस्या भएर 
• दम रोग लागेका र फोक्सो पूर्णरुपमा बिग्रिएर 
• कलेजोको समस्या 
• मृगौलामा समस्या भएर 
• रगतको नसाहरुमा रगत जमेर पनि गोडा सुन्निने हुन्छ । 
• हात्तिपाइले रोग लागेकाहरुमा पनि गोडा सुन्निने समस्या हुन्छ ।
• थाइराइडका बिरामीहरुको पनि गोडा सुनिन सक्छ ।
• शरिरको लिम्फ्याटिक सिस्टममा अवरोध हुन गएमा पनि गोडा सुनिन्छ ।
• बाथका बिरामीहरुमा जोर्नीमा दुखाई हुन्छ या जोर्नीमा सुजन आँउदापनि गोडा सुन्निन्छ ।
• हर्मोन सेवन गर्नेहरुमा र गर्भवति महिलामा पनि गोडा सुन्निने समस्या हुन्छ ।
• पिडा र दुखाई कम गर्ने औषधि धेरै सेवन गर्नेहरुलाईपनि गोडा सुन्निने समस्या हुनसक्छ ।
• कुनै कुनै उच्च रक्तचाप कम गर्ने औषधिहरुको सेवनबाट पनि गोडा सुन्निने समस्या हुन सक्छ । जस्तोः सिसिबि (एम्लोडिपिन) नामको औषधिले गोलीगाठो र गोडा सुन्निने हुनसक्छ ।
• लामो यात्रा गर्दा (हवाईजहाज वा बसमा) यात्रा गर्दा पनि गोडा सुन्निन सक्छ ।
• गोडामा भएका रगत–नसा जसलाई धमनि पनि भनिन्छ यिनको समस्या (भेनस इनसफिसियन्सी) हुँदा पनि गोडा सुनिन्छ ।
• कहिले काँही किराले टोकेर, एलर्जी भएरपनि गोडा सुनिने हुन सक्छ ।
• चोटपटक लागेर हाड भाँचिएर पनि गोडा सुनिन सक्छ ।

नोटः यदि गोडा सुनिने समस्या छ भने तत्काल चिकित्सकको परामर्श लिनुपर्दछ । गोडा सुन्निने समस्याको कारण खोज्नुपर्ने हुन्छ । कारण पत्ता लगाएर उपचार गरेपछि गोडा सुन्निने समस्याबाट मुक्त हुन सकिन्छ । कारण फेला नपरेपनि आत्तिईहाल्नु पर्दैन ।

स्वास्थ्य स्थिति सबै ठिक हुँदा हुँदै पनि गोडा सुन्निन सक्छ । यस्तो खालको गोडा सुन्निने समस्यालाई डिपेन्डेन्ट इडिमा भनिन्छ ।

कस्तो अवस्थामा डिपेन्डेन्ट इडिमा देखापर्छ ?
यस्तो किसिमको गोडा सुन्निने समस्या छालाको तल पानी जम्मा भएर हुन्छ । शरिरको जुन अंगमा बढी प्रेसर पर्छ वा भार पर्छ ति अंगहरुमा सुजन हुन्छ । खासगरी च्यापिएर बस्ने तथा झुण्डिएर बस्ने अंगहरुमा बढी सुजन आउने र सुन्निने गर्छ ।
हाम्रो शरिरमा अशुद्ध रगत तलबाट माथितिर बग्ने गर्दछ र उल्टो बाटो बहने रगत ग्र्याभिटेशनल फोर्सले पनि तल तान्ने गर्दछ त्यसकारण अधिकांश गोडा झुण्ड्याउने र उभिएर काम गर्नेहरुलाई गोडा सुन्निने हुनसक्छ । त्यसकारण अरु रोगहरु छैनन् भने आत्तिनु पर्दैन ।
यस समस्याको समाधानका लागि गोडा अलिकति माथि उठाएर (मुटुको सतहदेखी ३०.५ सेन्टिमिटर माथि राखेर) आराम गरेमा यो समस्या हराएर जान्छ ।

हात्तिपाइले रोगमा एउटा मात्र गोडा सुन्निने हुन्छ
यदि एउटामात्र गोडा सुन्निने गरेको छ भने त्यो हात्तिपाइले रोग वा गोडामा रगत जमेको अथवा अन्य कारणहरुले गर्दा पनि भएको हुनसक्छ ।
मुटुका रोगिहरुले अत्याधिक मात्रामा झोल पदार्थ तथा पानि पिएको खण्डमा पनि गोडा सुन्निन सक्छ ।
खानामा अत्यधिक नुनको सेवनले पनि गोडा सुन्निन सक्छ ।

गोडा सुन्निने समस्या भएकाहरुले के के जाँच गर्दा उपयुक्त हुन्छ ?

1. युरिया र क्रियाटिनिनको जाँच ।
2. पिसाबको जाँच (पिसाबमा प्रोटिन गए नगएको) ।
3. थाइराइडको जाँच ।
4. रगतमा प्रोटिनको मात्रा जाँच ।
5. यदि एउटामात्र गोडा सुन्निने भएको छ भने गोडाको नसाको डपलर जाँच तथा हात्तिपाइले रोगको परिक्षण गराउनुपर्छ ।
6. गोडा सुन्निएकाहरुको छालामा नसाहरु बटारिएको वा फुलेको छ वा छैन हेर्नुपर्छ ।
7. कलेजोको जाँच र मुटुको जाँच ।