वर्षायाममा लाग्ने रोग पनि धेरै हुन्छ। वर्षायामले रोग ल्याउने त होइन तर मौसमअनुसारको खानपान शैली हामीले नअपनाउँदा बिरामी भइन्छ । गर्मी मौसममा शरीरले चिसो मौसमभन्दा केही फरक खाना खोज्छ । जस्तैः चिसो मौसममा थोरै पानी खाँदा पनि केही फरक पर्देन, तर गर्मीमा पानी अलि बढी नखाए बिरामी हुने संभावना अधिक हुन्छ । यस्तो अवस्थामा बच्चाको स्वास्थ्यको ख्याल राख्नु एकदमै चुनौतीपूर्ण काम हुन्छ ।

वर्षायाममा बच्चाको स्वास्थ्यको ख्याल कसरी गर्ने ?
१. पर्याप्त पानी वा झोलयुक्त पदार्थ पिलाउने ।
२. मौसमी सब्जी, फलफूलको सेवन गर्नुपर्छ । सडेगलेको, बासी, जथाभावी राखिएको खानेकुराबाट शरीरमा रोगको संक्रमण हुनसक्छ । फूटपाथको खानेकुरा, जस्तै चटपटे, पानीपुरी, मम, चाउमिन जस्ता खानेकुराले पाचन प्रणालीलाई खराब गर्न सक्छ । यसैले बच्चालाई घरकै खानेकुरा मात्रै खुवाउनुपर्छ ।
३. घरबाहिर निस्कदाँ पुरै शरीर ढाक्ने पहिरन लगाइदिनपर्छ । यसले गर्दा धुलो धूँवा तथा घामको सोझो किरणबाट बच्चाको छालालाई जोगिन्छ ।
४. आँखाको सुरक्षाको लागि बच्चालाई छाता ओढाएर मात्रै हिड्नुपर्छ ।
५. बच्चाको सरसफाईमा विशेष ध्यान दिनुपर्छ । 
६.बच्चालाई स्वस्थ राख्नका लागि घरवरिपरिको वातावरण पनि स्वच्छ र सफा राख्नुपर्छ। 

घरवरिपरिको वातावरण कसरी सफा राख्ने ?

• गर्मीमा आफ्नो शरीरका साथसाथै वातावरणिय स्वच्छता पनि आवश्यक हुन्छ । आफ्नो घर, आँगन वा आफु बसोबास गर्ने आसपासको क्षेत्र सफा, सुग्घर भयो भने विभिन्न संक्रमणको भय हुँदैन ।
• लामखुट्टे, झिँगा, साङ्ला  नियन्त्रणका लागि घर एवं आसपासका क्षेत्रमा सरसफाई आवश्यक हुन्छ । गर्मीमा लामखुट्टेको टोकाईबाट बच्नका लागि झुलको प्रयोग गर्ने गरिन्छ । यो सही तरिका हो । जबकी लामखुट्टे भगाउन धूप बाल्नु स्वास्थ्यका लागि हानिकारक हुन्छ । 
• लामखुट्टेको प्रकोपबाट बच्न कतिले झ्याल–ढोका बन्द गर्ने गर्छन् । यद्यपी झ्याल ढोका पूर्ण रुपमा बन्द गर्दा कोठामा हावा आउजाउ गर्न सक्दैन । त्यसैले संभव भएसम्म झ्यालमा जाली लगाएर सकेसम्म खुला राख्नु राम्रो हो ।

वर्षायाममा बच्चालाई कस्तो खानेकुरा खुवाउने ?
आँप
आँप यस्तो फल हो, जसले यो मौसममा शरीरलाई चाहिने शक्ति प्रदान गर्नुका साथै स्वस्थ राख्न समेत सघाउँछ । आँपमा पाइने तत्वले ब्लडसुगरको लेभल घटाउन सहयोग गर्दछ । यसमा पाइने फिनोलिक्स कार्बोलिक एसिडले शरीरका सेलहरुको मर्मतसम्भार गरेर चुस्त–दुरुस्त राख्न सघाउने डाक्टरहरु बताउँछन् । यसैले बच्चालाई हामीले आँप खुवाउनुपर्छ । 
सलाद
यो मौसममा शरीरले पानी त धेरै माग्छ नै । पानी अलवा अरु पौष्टिक तत्व समेत हुने खानेकुरा खान सकियो भने दोहोरो बचावट हुन सक्छ । सलादमा ९५ प्रतिशत पानी हुन्छ । यससँगै यसमा मिनरल्स र प्रोटिनजस्ता लाभदायी तत्व पनि हुन्छन् । ओमगा–३, फाइबर, आइरन र क्याल्सियम समेत हुने हुनाले जंकफुड खुवाएर बच्चालाई भुलाउनुभन्दा सलाद खुवाउनुपर्छ ।
दही
स्वास्थ्यका लागि दही फाइदाजनक चिज हो । पानीको धेरै मात्रासँगै यसमा एन्टी एसिड पनि हुन्छ, जुन पेटका लागि असाध्यै लाभदायी ठहरिएको छ । यसमा प्रोबायोटिक्स ब्याक्टोरिया अधिक मात्रामा हुन्छ, जसले शरीरको इम्युनिटी पावर बढाउने विभिन्न अध्ययनले देखाएका छन् । पानी पिउन बच्चाले मन गरेन भने उनीहरुलाई दही खुवाउनु राम्रो हुन्छ ।
अमला
अमला भिटामिन सीको राम्रो स्रोत हो। एउटा अमलाले ३ वटा सुन्तलाको बराबर भिटामिन सी प्रदान गर्छ । भिटामिन सीले शरीरमा हुने विषालु पदार्थलाई सजिलै बाहिर निकाल्न मद्दत गर्दछ ।
कागती
कागतीमा उच्चमात्रामा पानी हुनुका साथै क्याल्सियम, आइरन, कपर, सोडियम, म्याग्नेसियम, फोस्फोरस र पोटासियम जस्ता खनिज र फोलेट, भिटामिन ए, इ र केजस्ता भिटामिनहरु पाइन्छ । बच्चालाई यो वर्षायाममा कागती पानी दिनु धेरै राम्रो हुन्छ ।
यसले रोग प्रतिरोधी क्षमतामा वृद्धि गरी मलेरिया, डाइरिया, निमोनियाजस्ता रोगको संक्रमण हुन दिँदैन । यसमा पाइने भिटामिन सीले रुघाखोकी, ज्वरो आउन दिँदैंन ।