मङ्कीपक्स के नयाँ महामारी हो ?
यसको सरल जवाफ हो, होइन । डब्लुएचओका अनुसार मङ्कीपक्स अन्य संक्रमणजस्तो संक्रामक होइन, न त यो कोभिडजस्तो  मानिसमा सजिलै सर्छ । मङ्कीपक्सको संक्रमण संक्रमित व्यक्ति वा उसले प्रयोग गर्ने चीजहरूसँगको प्रत्यक्ष सम्पर्कबाट फैलिन्छ । मङ्कीपक्स कोरोना जत्तिको संक्रामक भने छैन ।

समलिङ्गीहरू मात्र जोखिममा छन् ?
मङ्कीपक्सले जसलाई पनि प्रभावित गर्न सक्छ । यदि तपाईं संक्रमित व्यक्ति वा संक्रमित व्यक्तिको सामानसँग लामो समयसम्म सम्पर्कमा हुनुहन्छ भने तपाईंलाई पनि यो रोग लाग्न सक्छ ।
यसबाहेक स्वास्थ्यकर्मी र यौनकर्मीलाई पनि संक्रमणको जोखिम हुन सक्छ । अर्कोतर्फ, गर्भवती महिला, साना बालबालिका र स्वास्थ्य समस्या भएका व्यक्तिहरूले विशेष रूपमा सुरक्षित हुन आवश्यक छ ।

यसको कुनै उपचार छैन ?
अधिकांश अवस्थामा, उपचारको आवश्यकता पर्दैन । सबै लक्षण क्रमशः कम हुँदै र हराउँदै जान्छन् । आवश्यक परे  दुखाइ र ज्वरोको लागि औषधि खान सकिन्छ । बिरामीले पौष्टिक खाना खानुपर्छ, आफूलाई हाइड्रेटेड राख्नुपर्छ र पर्याप्त सुत्नुपर्छ ।
छालामा उठेका फोका वा दागलाई नछुनुहोस् । नकन्याउनुहोस् । यी घाउलाई समय समयमा सफा पानी र एन्टिसेप्टिकले सफा गरिरहनुपर्छ ।
मङ्कीपक्सविरुद्ध प्रभावकारी भएका केही औषधिहरू: भ्याक्सिनिया इग्युनोग्लोबुलिन, एसटी–२४६ र सिडोफोविर ।

के सेक्स गर्दा मङ्कीपक्स हुन्छ ?
सामान्यतया यस्तो हुँदैन । यदि तपाईंको शरीरको कुनै भागमा रातो दाना वा बिमिराजस्ता मङ्कीपक्सका लक्षणहरू छन् र त्यस्तो अवस्थामा तपाईंले कुनै सुरक्षाविना यौनसम्पर्क गर्नुभयो भने तपाईको शरीरको संक्रमण तपाईंको पार्टनरको शरीरमा पुगेर मङ्कीपक्स हुनसक्छ ।
यहाँ ध्यान दिनुपर्ने अर्को कुरा के पनि छ भने मङ्कीपक्स केवल यौन सम्पर्क गरेर मात्र हुने होइन । यदि संक्रमित व्यक्तिको नजिकको सम्पर्कमा हुनुहुन्छ भने,  तपाई संक्रमणको जोखिममा हुन सक्नुहुन्छ ।

मंकीपक्स परीक्षण गर्न सकिन्छ कि सकिदैँन ? 
कोभिडजस्तै मंकीपक्सको परीक्षणका लागि पनि आरटीपीसीआर परीक्षण गरिन्छ । कोभिड परीक्षणका लागि घाँटी र नाकको स्वाब लिइन्छ भने मंकीपक्समा शरीरमा देखिएका डाबर भित्रको पानीको परीक्षण गरिन्छ ।